شاطر
استعرض الموضوع السابقاستعرض الموضوع التالي
07012012

بكتب الموضوع وكلي امل في الله انكو تكونوا بخير واحسن صحة دايما يارب ومحدش منكم يزورها اي مرض ان شاء الله ويشفي كل مريض يا رب امين
الموضوع دا مهم جدا جدا فوق الوصف لكل واحدة متجوزة او لا لكل انثى كبيرة و صغيرة شيء لازم يبقى جزء من روتينا و نتعلمه كلنا ونداوم عليه عشان الصحة غالية قوي ودرهم وقاية خير من قنطار علاج وحتى لو مكنش الفحص الدوري دا وقاية الا انه اهم حاجة في الاكتشاف المبكر لاقدر الله لاورام الثدي عشان العلاج يبقى فعال بامر الله 100 %
مش هطول عليكو هدخل في الموضوع على طول
اولا: ايه الفحص الدوري ده؟
دا فحص الواحدة بتعملو لنفسها كل شهر بعد كل دورة يعني( اسفة اني هستخدم تعبيرات عامية كتير بس عشان الكل يفهم ويستفيد ان شاء الله)
عشان تتأكد باذن الله من خلو صدرها (الثدي) من اي تغيرات واللي ممكن تبقى حميدة في اغلب الحالات ان شاء الله ولو لا قدر الله كانت خبيثة(سرطانية) تقدر تتعامل معاها بسرعة وفعالية

ثانيا: امتى اعمله
السن يفضل كل بنت من وقت ما يبدا صدرها يكبر تتعود تعمل الفحص ده عشان يبقى حاجة اساسية في حياتها وتتعود عليه
بس هو يفضل يتاخد بجدية من بعد 20 سنة لا ن نسبة الحالات اللي قبل السن ده ضئيلة جدا والحمد لله ويبقى واجب ولازم جدا من سن 35
توقيته ايه في الشهر: بعد الدورة الشهرية على طول خليه روتين ليكي وانتي بتغتسلي من الدورة علشان الصدر ساعتها بيبقى طري جدا و بسهولة تقدري تلاحظي اي تغير حصل فيه وبيبقى الاحتقان اقل في الوقت ده


ثالثا: ازاي اعمل الفحص ده؟
ده فحص سهل وبسيط جدا بيتكون من كذا خطوة سهلين و بينقسم لقسمين اساسين
الاول: فحص الثدي (الصدر)
ودا على مراحل اول حاجة بالعين
تقفي قدام المراية و يبقى الجزء من اول الرقبة لحد السرة واضح جدا قدامك عشان تقدري تحددي الاختلاف
تقارني الصدر اليمين والشمال ببعض من حيث الحجم الشكل المستوى من البطن
تغير لون الحلمة او شكلها او اي افرازات منها في الهدوم او باينة قدام عينك
وبعد ماتقارني كويس هتبدئي تحطي ايدك في وسطك وتضغطي جامد وتلاحظي اي اختلاف في شكل اي حاجة من الصدر
و بعد كده ترفعي ايدك لفوق وتبصي برضو
وبعدين لقدام
وكدة خلصنا العين ويارب يكون كله تمام

تاني حاجة باليد:
وليه طريقتين على حسب حجم صدرك وكثافته
بس اهم حاجة هتستخدمي ايدك ازاي
متستخدميش اطراف الصوابع كده هتتخضي من اولها لان اغلبنا عندنا كلاكيع صغيرة محسوسة ودا طبيعي
استخدمي كف ايدك (راحة الايد)
الفكرة كلها انك بتفحصي صدرك وبتضغطيه ضد حاجة صلبة عشان تحسي بكل الانسجة تحت ايدك
يعني ايه الكلام ده؟
يعني في الطريقة الاولى تكون الحاجة الصلبة دي ايدك التانية هتمسكي صدرك مابين بطن ايديكي الاتنين و هتعدي على الصدر كله تدوري على اي تغير او حاجة صلبة لا قدر الله
ودي لو كان صدرك ما شاء الله كبير قوي و متدلي

التانية انك تفحصي صدرك بضغطه ناحية القفص الصدري (ضلوعك) بايد واحدة وتعدي بحركة دائرية على الصدر كله


بس احنا لسه مخلصناش الصدر
هتبدأي تعصري الصدر من كل اتجاهاته وتلاحظي خروج اي افراز او دم لا قدر الله
وتعصري الحلمة بس مش قوي عشان متتسببيش انتي في ضرر للصدر وتتخضي على الفاضي


الخطوة والجزء التاني والمهم
فحص تحت الباط(الابط)
ودا بيكون انك بتعدي صوابعك جوة الابط و تفركيه في جميع الاتجاهات
بندور على ايه؟
لا قدر الله على اي كلاكيع صلبة وغير مؤلمة

وطبعا دة بيكون على النحيتين
كده احنا ان شاء الله خلصنا
ويارب برضو كله يكون طبيعي


لو لاقيتي حاجة تعملي ايه
اولا متتخضيش
تانيا ركزي الفحص في المنطقة دي عشان توصلي لاكبر قدر من المعلومات
تقلقي امتى؟ لو لاقدر الله لاقيتي شيء صلب زي ازلط تحت ايدك وغير مؤلم او معاه افرازات دم او لا قيتي الحلمة دخلت لجوة و مشدودة و تكون دي مش طبيعتك من الاول او لاقيتي كلاكيع محجرة و غير مؤلمة تحت الباط

تعملي ايه ساعتها؟
من غير خوف ولا ذعر الجاي لاقرب طبيب عشان يعملك الفحوصات الازمة اللي هي
1)يعيد الفحص بنفسه
2) تعملي اشعة على الصدر معاها سونار (ماموجرام)
3)يسحب عينة بالابرة عشان تتحلل

نصيحة ذهبية: ارجوكو محدش يخاف ابدا ويخبي او يكبر دماغه ويقول بسيطة الموضوع دا اهم حاجة فيه سرعة اتخاذ اللازم ودا نتيجته مضمونة بفضل الله
اعملي لنفسك جدول فحص ووصي امك و بناتك وجيرانك واصحابك عشان نقضي على المرض دا وربنا القادر على كل شيء
خلي احب الناس ليكي يفكرك بالفحص دا عشان يكون اهميته من اهمية الناس اللي انتي لازم تبقي كويسه عشانهم واولهم نفسك

ويارب محدش يلاقي اي حاجة غير طبيعية وحتى لو لاقيتي متقلقيش خالص الكشف المبكر غير طريق المرض ده وخلاه باذن الله من اسهل الحاجات اللي بتتعالج جراحيا وفي المراحل المبكرة مبيحتاجش حتى علاج كيماوي

لو في اي تقصير اعذروني ولو اي استفسار يسعدني اني اساعدك

رجاء لكل من تقرا الموضوع الدعاء لوالدتي بتمام الشفاء العافية و البركة في العمر والصحة

ولو اعجبك فلا تنسيني من الدعاء و التقيم لتعم الفائدة باذن الله
اللهم اجعل هذا العمل خالصا لوجهك الكريم
مُشاطرة هذه المقالة على:diggdeliciousredditstumbleuponslashdotyahoogooglelive

تعاليق

avatar
تسلم ايديك ياقمر بس عندى سؤال صغنون انا لسة برضع بنوتى هينفع اعمله فى الوقت دا ولا استنى بعد ما اخلص رضاعة يعنى بعد الفطام وربنا يجيكى خير وربنا يشفى ويعافى والدتك ويعطيها الصحة ويخليها ليك ياااارب
avatar
اولا ميرسي ليكي جداااااااا يا عطر الروح

ثانيا في موضوع انك لسه بترضعي علي نظيف يعني مش بتجي البيريود يبقي مش لازم الاختبار

ولو بتجي يبقي تعمليه لتأكد بس علي صحتك

وربنا يحميكي ويبارك فيكي

نورتينيييييييي
avatar
بارك الله فيك وجزاكى الله خير الجزاء ويارب يتم شفاء والدتك ويشفى كل مريض ياااااااااارب يارب قبلاتى
يارب يشفى والدتك بس انا عندى سؤال يعنى لو فى حاجه صلبه بس معاها الم بسيط فى الصدر بس ده معناه ايه يارب يكون خير للجميع ويشفى كل مريض يارب
avatar
شكرا ليكم كلكم

ويارب اكون افدتكم ولو بشئ بسيط

نورتوني
avatar
منسا كتبت

يارب يشفى والدتك بس انا عندى سؤال يعنى لو فى حاجه صلبه بس معاها الم بسيط فى الصدر بس ده معناه ايه يارب يكون خير للجميع ويشفى كل مريض يارب

بصي يا منسا يا حبيبتي ربنا يسلمك ويحميكي يارب

بس نصيحة انك تروحي تعرضي نفسك علي دكتورة لاطملأنان فقط

وان شاء الله خير
جزاكي الله الف خير يا حبيبتى يارب يشفي امك ويطول في عمرها يارب
avatar
استعرض الموضوع السابقاستعرض الموضوع التالي
صلاحيات هذا المنتدى:
لاتستطيع الرد على المواضيع في هذا المنتدى