النظام الغذائي ( لا للأتي ...... المقليات _الارز _ المكرونات _ العيش )

ده اسم اول نظام لينا في اول اسبوع

وده انشالله هينزلنا علي الاقل 3 ك في الاسبوع لو التزمنا بيه والتزمنا بالتعليمات اللي كتبتها قبل النظام


الفطار :- شاي بلبن او بدون ــــ قهوة باللبن او بدون ـــــ نسكافيه باللبن او بدون حسب الرغبة والتحلية بسكر سويتال اللي اتكلمت عليه فالتعليمات انسي السكر العادي انسيييييييييييييييييييه..


فول -جبنة-بيض-زبادي- اي حاجة متعودة تفطري بيها افطري بيها عادي بس بشرط من غير عيش خاااااااااااااااااااااااالص كلي حاف بالمعلقة كده اي كمية ومتخافيش هتشبعي ولو حاجة محتاجة زيت حطي ملعقة صغيرة زيت بسسس


الغذاء:- بردو اي حاجة بتاكليها عالغدا ماعدا العيش والمكرونة والارز والمقليات تاكلي سمك او لحمة او فراخ مشوي او مسلوق مفيش حاجة من دول اي حاجة عندك بئا بيض تونة اي حاااااااااااجة عندكو كلوها وامنعي الحاجات اللي قولت عليها


العشاء:- اعمليلك طبق سلطة كده فيه كل حاجة او زبادي او بيضة مسلوقة او طبق فول صغير زطبعا من غير عييييش دي الوجبة الوحيدة اللي هتقللي اكلك فيها


اهو مش محرومين من حاجة هتاكلو الكميات اللي انتو عايزنها بس حااااااااااف ولا رز ولا عيش ولا مكرونة ده في اول اسبوع بس بعد كده هنغير بس هنشوف مين مشي معاه النظام ده ومين لا بس انشالله هيمشي معانا كلنا وهتنزلو جامد بس بعد ماتنزلو امانة عليكو تدعولي


انا مانعة ليه الارز والمكرونة والعيش عايزة اقولكم ان الحاجات دي بجد هيا اللي بتعمل الهانش وهيا اللي بتعمل الكرش هنجرب ونشوف لو منعناها اسبوع ايه اللي هيحصل اوكي

ويلاااااااا يااميرات علي بركة الله


وكل يوم كلنا ندخل ونقول يومنا مشي ازاي واللي مشي صح يقول واللي لخبط في حاجة يقول ومستنية ملاحظتكم او اسألتكم في اي حاجة ونشوف النتيجة انشالله يوم 7-2 بأذن الله وبالتوفيق انشالله ومتنسوووووووووووووووش الماية اهم حاجة نشرب ماية

انا بئا بدأت من النهاردة وكاكلت كل حاجة ماعدا الممنوعات (المقليات - والارز - والمكرونة- والعيش - الحلويات )
وبعدين بعد الغدا روحت الجيم انا بروح 3 ايام في الاسبوع تمارين كده مش الات ياااريت مع الدايت يكون في حركة بجد هتفيدكو اوووووي عشان جسمك يتشد لو مفيش تمارين ممكن 3 ايام في الاسبوع تنزلي تمشي في اي نادي او تحت بيتك كده لمدة نص ساعة وانشالله هتبقي مانيكان


يلا مستنية يومياتكم انتو كمان

انا شغاله أهه بس عايزه أعرف عادي أشرب حاجات كتير بسكر الدايت....يعني شربت الصبح نيسكافيه وبعد الدهر شاى أخضر وبعد الغدا شاى أبيض....ممكن أشرب حاجه تانيه كمان ولا أيه؟؟؟
ولما أجوع فالنص ممكن أكل فاكهة صح؟؟؟
و الفطار أكلت كورن فلكس بتاع الدايت وقطعة جبنة قريش ممكن برده يبقي ده كل يوم؟؟